يوم انصدمت بدنيتي..دورتك جنبي مالقيتك!!

الجزء التاسع
الفصل الثاني
قعدت قمر تفكر وش ممكن تسوي؟؟تراها تعبت من التفكير ثم قامت وأخذت دفترها الخاص بالخواطر كتبت فيه وهي تعبانة من التفكير:
((جرحته وبيدي دواه ...مثل ما جرحني اللي فكر يرميني..
غلطته تجاوزت حيل غلاه...والله ما أرجع له ولو بيده يشفيني..))
ورسمت بنفس الورقة عين تبكي وقعدت تكتب اسم فارس كل مرة بجهة وكل مرة بلون ثم قعدت تتأمل اسمه وتكلم نفسها:والله أني أحبك وأموت فيك أنا اللي مجنونة فارس بس مع كذا كرامتي ما تسمح لي أرجع لك لازم أول تحس بحجم غلطتك لازم أهينك مثل ما أهنتني لازم قمر تعلم فارس ما يستهين فيها تحبه بس لازم تجرحه..<<منطق غريب صح؟؟

**أما فيض كانت بعالم ما فيه إلا سلطان تصبّح على صوته وتمسّي عليه بس مع كذا ما تدري ليه تحس إن حياتها ما راح تكون معاه وإن قصة حبهم ما راح تكتمل بس بعدين تهز رأسها و تحاول تطرد هالوسواس منها..
وتذكرت أن اليوم ميلاد سلطان وللحين ما اشترت له هدية ولا زم تتجهز وقالت لازم آخذ ذوق رجال بالهدية ولازم ذوقه يكون حلو بس مين يا فيض مين؟؟

**تركي كان قاعد بالحديقة ويحاول يطرد ذكراها.. لأنها خلاص إنسانة متزوجة بس كل ما حاول ينساها.. يذوب زود في هواها.. عجز يطردها من رأسه عجز يكمل حياته بفرقاها..أحبك يا فيض ولو وقف بوجهي زماني والقدر والناس وإذا كان الهوى غلطة رضيت بغلطتي تدرين يا ليت مثلك بالخلق ملايين لكن حلاة الشي ندرة وجوده..وينتبه أن جواله يرن"بكيت بيوم فرقاها تقل بين الحنايا نار ..وكني فاقد الدنيا ولاني قادر أتصبر"عرف أنها فيض هذي الوحيدة اللي مخصص لها هالنغمة ..
رد بلهفة:الوو
فيض بنعومة:هلا والله بتركي وش أخبارك؟؟
تركي يبتسم على نعومتها:الحمد لله بخير وأنتِ؟؟
فيض:الحمد لله تمام..بس تركي؟
تركي"يا عيون تركي":هلا
فيض بخجل:أبغى منك شي وما اخترتك إلا لأني واثقة بذوقك
تركي:آمري وش بغيتي؟
فيض:والله ما ني عارفة كيف أقول لك بس..امممم اليوم ميلاد سلطان وما اشتريت له شي وأبغاك تساعدني..
تركي سكت ما توقع هالطلب ما تدري أنها بطلبها هذا تذبحه زود عن ما هو مذبوح ويتذكر باسم سلطان أنها خلاص ما عادت له ..
أما فيض بسكوته توقعت أنه رافض أو مشغول بس مو قادر يقول لها وأحرجته بسؤالها:تركي..الظاهر أنك مشغول و..
تركي انتبه على صوتها وقال:لا عادي خلاص دقايق وأكون عندك كوني جاهزة مو تخليني ملطوع برى ترى أروح عنك
فيض بدلع:ما تقدر تسويها بتنتظر ورجلك فوق خشمك
تركي:كأنك دارية ما أقدر أسويها فيك يا عمري
تركي ما توقع أنها تسمعه كان قصده يكلم نفسه بس حاول يرقع الموضوع:زلة لسان متعود على قمر
فيض ضحكت:يا حظ اللي بتأخذها إذا هذا كلامك لأختك وش بقيت لها؟؟
تركي"كان ودي تكونين زوجتي بس صار اللي صار":إيه والله يا حظها
فيض:يلا مع السلامة
تركي:مع السلامة
و جاء تركي وخذاها عشان يختارون هدية لسلطان وتركي كان فرحان بس بمجرد وجود فيض معاه وجودها جنبه يسوى الدنيا وما فيها بالنسبة له..

**ويوم اختاروا الهدية لسلطان راحت فيض وتجهزت ولبست ليلكي لأنه لون سلطان المفضل تدري أنه يموت فيه هاللون وكان فستانها عاري بدون أكتاف ماسك على جسمها مع مكياج سموك أسود على ليلكي مع الجزمة والشنطة <<لزوم الكشخة...وتركت شعرها على طوله اللي غطى نص ظهرها غيرت لونه أسود فاحم مع خصلات هاي لايت ليلكي طلع روعة عليها وراحت بيت سمر وسلطان عشان تجهز أعراض المفاجأة..

**أما سلطان كان ناسي إن اليوم كان ميلاده من الأساس بس فيض اتفقت مع سمر أنهم يطلعونه من البيت ألين ما تجي فيض وتجهز له كيكته وهداياه وبعدين يفاجئونه..

**أما تركي من بعد ما وصلها راح غرفته ومر على غرفة قمر لقاها نايمة وعلى وجهها آثار دموع وضامه دب مكتوب عليه "سامحيني"<<أكيد عرفتوه..وقال يمكن زعلانة على وحدة من صديقاتها ويوم وصل لغرفته راح لكتابه اللي أهجته إياه فيض قبل ما يسافر وأخذ له قلم عشان يكتب قصيدة ذكرته فيها و فتح تركي الصفحة الأخيرة من الكتاب وشاف فيض موقعة عليه وكاتبه..
"تركي إذا رحت أمريكا انتبه على نفسك ويا ويلك مني لو تناظر عيونك البنات!!"
كتب تحتها هالأبيات اللي تعبر عن مشاعره يوم سمع عن خبر خطوبتها:
((جاني الخبر يا صاحبي و أظلم الكون..
قــــــــدام عيني ثم نطقت الشهاده..
عالعموم أقولها لك ألف مليون..
مبـــــروكٍ في قلبٍ شكا لك بعاده..
مبروكٍ ولا يهمك سواليف وظنون..
من عاشقٍ يهديك فرحة فـــــؤاده..
سوي الفرح اليوم وإبليس ملعون..
واللي يشب النار يجني رمـــــاده..
أنا أول العالم على الصالة يلفــون..
أول معازيم الفرح والحــــــداده..))

**وصل سلطان للبيت بس استغرب أن البيت ظلام وقال يمكن سمر نايمة ويوم دخل الصالة
صرخ:وجع وش ذا؟؟<<دفش ما فيه عنده تفاهم..
سمر وفيض كانوا واقفين وصرخوا:سبرايـــــــــــــــــــز ..وولعوا اللمبة
فيض:كل عام و أنت بخير حياتي
سلطان متنح و مو مستوعب اللي صاير؟؟
فيض خافت عليه وراحت له ووقفت عنده تناظر وجهه:سلطان حبيبي وش فيك ساكت تعبان ؟؟فيك شي يعورك؟؟
سلطان مسك يدها و باسها :جننتيني باللوك هذا يا عمري ...وناظرها من فوق لتحت وكلمها بنص عين:أنتِ ناوية تذبحيني ولا وش صاير؟
فيض استحت:منه وبدلع:سلطـــان
سلطان انهبل على دلعها :قلبه وروحه آمري
فيض همست له بأذنه :سلطان قلبي خل عنك الغزل بعدين سمر هنا تراني أستحي
سلطان:فديت اللي يستحي أنا
سمر:سلطان ياخي خف عالبنت شوي شوف وجهها ألوان
سلطان بغرور:كيفي زوجتي يعني حلالي أنا وعلى راحتي حتى لو...."همس بأذن فيض"
فيض بعدت عنه وهي محمرة من الخجل وضربته على كتفه:سلطان يا وصخ!!
سلطان بخبث:ما قلت شي غلط حلالي صح ولا لا؟
فيض تجاهلت كلامه وسحبته من يده وغمضت عيونه وراحت جابت الكيكة اللي كان مطبوع عليها صورة لفيض وسلطان مرررررة روعة ويوم فتح سلطان عينه اندهش من الصورة المطبوعة قربت فيض مننه وقالت له:كل عــــــــــــام وأنت روحي يا روحــــــــــي
مسك سلطان يدها وقال بصوت رومانسي وعيون هيمانة :أموت فيك ولله ويلومني فيك يا روح سلطان وجلس على ركبه وحدة وهو لسى ماسك يدها وقعد يغني لها:
(( عيدي مبارك فيك يا عيد الأيام...
حلوة سنيني فيك يا عيد روحي ..
سعادتي في شوفتك حلم الأحلام..
شعري وأحاسيس المحبة وبوحي..
إن قلت لي كل عام أنا أقول الأعوام..
بدون شوفك هي سبايب جروحي..
هليت فيك العيد من فرحة أيام ..
هليت فيه وجاني عطرك يفوحي..
أنت المهم ومن ملا قيام..
حبيت أهنيك يا هواي وطموحي..
عيد السنة عيدين بحساب الأرقام..
و أنت الهنا وأعياد عمري وروحي..))وكمل :كل عـام وأنت روحي وعمري وكل دنيتي..
سمر:الظاهر أروح أنام أحسن لي قلة الحياء اللي هنا والمغازل كل واحد يتغزل شوي بالثاني خلاص ارحموني أنا صغيرة!!

**كان قاعد بغرفته يفكر شلون ينتقم أنها لازم يفكر بطريقة تخليها تندم على أنها رفضته كان لازم تعرف أنها لي ..لي أنا وبس ومدام رفضتني ما راح تكون لغيري!! وأشوف آخرتها يا أنا يا أنت ِ يا فيض مو أنا اللي ترديني و إن ما خذيتك ما أحد بيأخذك!!

تتوقعون مين اللي كان يتكلم ما في غيره يوســـــــف

**فارس كانت الدنيا ضايقه عليه شلون أهنتها كذا معقولة هانت علي دموعها كله بسبب غبائي خمنت و افترضت فرضيات بدون ما أتأكد ولا حتى أسألها ولا أفكر بسبب ثاني يخليها تفكر تطلع مع واحد ليه دائماً كذا يصير فيني وفي حياتي كلما لقيت شي يعجبني أخربه و أدمر سبب سعادتي بنفسي كيف هانت علي بعد كل هالحب اللي حبيتها ووجهته لها ..لا لا لازم هالمرة أعدل غلطتي أنا أحبها عشان كذا ما راح أتخلى عنها مستحيل أخليها تروح من يدي لازم أخليها تفهم وجهة نظري وتفهم السبب اللي خلاني أمد يدي عليها كيف بالأصح تجرأت وجرحتها وأهنتها قدام الكل معقولة لهالدرجة أرخصتها؟؟ ما تسوى عندي شي؟؟ لا صحصح يا فارس هذي حياتك ودنيتك وكلك كيف ما تسوى ؟؟ هذي الوحيدة اللي ملكت قلبي من بين الملايين ..ولازم ترجع لي ولو كان آخر شي أسويه بحياتي..
لعيون بريبر وعموريه <<بنات مشتاقة لكم مووووت
@@@@@@@@@@@@@@@@@@@@@

_________________

الجزء العاشر

**مرت ثلاث شهور على أبطال القصة وكل واحد عايش بدنياه..

**كانت تتفرج عالتلفزيون و مررة طفشانة حتى فيض انشغلت عنها بتجهيزات العرس من أسبوعين وهي يا عمري تدور بالأسواق وانتبهت على جوالها وهذا الاتصال السادس استغربت :مين هذا اللي يتصل على الساعة 6 المغرب وردت على الرقم الغريب لأنها فكرت لو كان واحد نزعج ما راح يتصل بهذا الوقت أكيد هذا موضوع مهم..
قمر بتردد:الوو
المتصل:هلا والله ..لو سمحتِ هذا جوال قمر؟
قمر استغربت"الله يعين":أنا قمر
المتصل: هلا والله وش أخبارك؟
قمر: الحمد لله بس مين معي؟
المتصل:أنا أنا امممم والله ما أعرف كيف أقولك بس بقولها بسرعة وإذا ما صدقتيني صكي السماعة بوجهي وروحي تأكدي من أبوك
قمر:وش دخل أبوي بالموضوع؟
المتصل:أبوك هو الأساس بالموضوع أصلاً
قمر عصبت:لو سمحت تكلم بسرعة مين أنت ؟
المتصل: أنا ..بدر
قمر:مين؟
بدر:معاك بدر بن عبد العزيز
قمر:يعني؟
بدر:يعني ولد عمك
قمر بصدمة:ولد عمي!!

**سلطان :حبيبتي بروح معاك والله اشتقت لك ومن زمان ما شفتك
فيض:لا ما راح تروح ببعدين أحسن عشان تشتاق لي وإذا جيت تشوف ملابسي
سلطان بخبث: أصلا شايفها كلها شايفها
فيض:سلطااااااااااااااااان
سلطان:أنا الحين بأكون عندك باي
وصك السماعة بوجهها

**سلطان يكلم نفسه : والله وحشتني الحمارة وكل ما أدق عليها "مشغولة" ولما أبي أشوفها"ما يصير" ترى زواجنا بعد أسبوعين وهي مكبرة المسألة .. وجلس يناظر نفسه بالمرآية اللي في غرفته .. والله أني أجنن و مملوح<< مغرور..بس بعد مفروض أسجد لربي سجود شكر لأن وحدة مثل فيض بجمالها ورقتها ودلعها تكون لي أنا .. لي أنا وبس...

**في نفس الوقت فيض جالسه تفكر.... وش أسوي إذا جاء؟؟ والله أني بموت وأشوفه بس كذا مخالف للتـ...لحظه أنا من متى أتبع العادات والتقاليد؟؟أنا مو مجبورة أمشي عليها ..ووقفت على رجولها بسرعة وركضت لعبايتها وتعدلت عشان إذا جاء تسحـــــره..

**قمر دخلت على مكتب أبوها وجلست على واحد من الكراسي الموجودة هناك قبال المكتب وقعدت تتأمل أبوها وتتذكر الكلام اللي سمعته الحين من اللي مفروض يكون "ولد عمها" وتفكر إذا كان صادق ولا لا بس في قلبها شك ولازم تقطعه باليقين..
عبد الرحمن << أبوها: قمر وش فيك؟؟
قمر انتبهت على صوت أبوها اللي قطع عليها سرحانها : هلا يبه وش قلت؟
عبد الرحمن: لا والله بس قلت غريبة داخلة عندي بالمكتب قلت أكيد فيك شي صح؟؟
قمر بتردد:يـبه
عبد الرحمن: سمي وش تبين؟
قمر زاد توترها: يبه .. أنت عندك..امممم وسكتت
عبد الرحمن: عندي وشو؟
قمر بارتباك شديد:أخــو؟؟
عبد الرحمن بهدوء: مين قال لك هالكلام؟
قمر بصدمة :يعني صدق الكلام!!
عبد الرحمن وهو يصك على أسنانه: قمر تكلمي من قال لك هذا الكلام؟؟
قمر: واحد يقول أنه ولد عمي واسمه بدر بن عبد العزيز وقال أن عمي مريض وبيموت ويبغـ..
وقف عبد الرحمن على طول: أخوي بيموت!!
قمر : يقول أن فيه جلطة بالقلب و..
طلع عبد الرحمن بسرعة من المكتب وقمر تنادي على أبوها ..

**راحت قمر مع أبوها للمستشفى سألوا عن عبد العزيز الـ.. وعرفوا أنه بغرفة خاصة بعد ما تعرض للجلطة و أنه لازم يرتاح ويوم لقوا عبد الرحمن "أبو قمر" مصر يدخل ويشوف أخوه سمح لهم الدكتور يدخلون شرط ما يطولون عنده ويوم دخلت قمر الغرفة انصدمت من الشبه الكبير بين أبوها وعمها وكيف أبوها أخفى عنها سر كبير مثل هذا وليش أخفاه أصلاً هذي كلها أسئلة تدور برأس قمر تبي لها أجوبة...
ويوم رجعوا البيت كانت بتتكلم بس أبوها قاطعها: بأكلمك بالمكتب وراحت للمكتب ولقته جالس..
عبد الرحمن:قمر اجلسي عشان تسمعين السالفة بالتفصيل..

** دخلت قمر هالمرة غرفتها وهي تفكر بالكلام اللي سمعته من أبوها اللي شرح لها فيه الحقيقة اللي كان طول هالسنين مخفيها ..أن أبوها عبد الرحمن تقدم لريما أمها بس أخوه اعترض وقال له عبد العزيز لعبد الرحمن أنه يبيها وتخاصموا عليها ويوم ريما "أم قمر" اختارت عبد الرحمن وتزوجته أخوه عبد العزيز تزوج وحدة ثانية وعلى طول جابت له بدر وريما << بنت عبد العزيز اللي سماها على أم قمر زوجة أخوه اللي يحبها..أما أبوها وأمها حاولوا كم سنة في المستشفيات والعلاج ألين ما الله كتب لهم بعد هالسنين كلها ثمرة حبهم وتعبهم "قمر" بس أخوه كان مقاطعه أصلاً من بعد زواج عبد الرحمن و ريما وقطع كل وسائل الاتصال من بينهم .. ويوم سألن قمر عن سر الشبه الكبيــــر بينهم قال بعد ما ضحك على كلامها أصلاًً طبيعي نشبه بعض أولاً أخوان ثانيا توأم
.. ويوم فهمت قمر السالفة عذرت أبوها وزعلت على شكله لما عرفت أنه لما زار أخوه قبل كذا كم مرة بس أخوه ما رضى عليه وطرده وما بغى يكلمه نهائياً و حزنت على أبوها وقررت أنها لازم تجمع العائلتين من جديد مع بعض..

** قمر اتصلت على فيض وسمر عشان ترتب أمور حفلتها بعد محاولاتها اللي نجحت بالأخير بدعوة بدر وريما للحفلة لأنها فكرت أن إذا الصغار تراضوا الكبار ممكن يتراضون بعد .. ووصلوا البنات وبدوا التجهيزات البسيطة لأنه ما راح يكون موجود إلا ناس قليلين مثل سلطان وفارس وبدر وتركي ومن البنات ريما وقمر وسمر وفيض وكانوا البنات عازمين القروب الصغير عشان يأخذون راحتهم وما يتغطون مع اعتراض سلطان بالبداية على فيض وسمر بس بمكر النساء اللي استخدمته فيض اقتنع بصعوبة ووافق بعد ما أقنعته بطرق خبيثة ولا ننسى تركي اللي كان رافض يجي بس عشان فيض أجبرته وترجته وما وافق هو إلا عشان يشوفها ..

**يوم وصلوا المدعوين الحفلة بصعوبة البنات تقبلوا ريما لأنها كانت من النوع المغرور أما فارس وسلطان وتركي تقبلوا بدر بسهولة لدمه الخفيف وجراءته وروحه المرحة ويوم بدى الـD.J اللي البنات تكفلوا فيه وكانت الأغاني روعة عربي و انجليزي والكل خذا راحته بالرقص خصوصاً البنات اللي بدعوا ..
ويوم جلسوا البنات من التعب راحت سمر للمغاسل تعدل ماكياجها الناعم وراحت عند المرآيات وعدلت ماكياجها وكانت حاطه كحل ولون فضي مخملي مخلي لونها روعة وروجها الوردي اللامع وكانت المرآية اللي واقفة عندها سمر بطولها وتسمح لها تشوف لبسها بالكامل وراحت تعدل بلوزتها وكانت لابسة بلوزة بيضاء cat عليها كتابات فضية وبنطلون low west وحاطه حزام فضي محدد خصرها وكعب فضي معه ورافعه شعرها ونازل منه على وجهها خصل..
سمر:وش ذي الحوسة يا ربي والله أني موهقه نفسي

** بدر كان رايح للمجلس يجيب جواله اللي نساه هناك وهو راجع من المجلس لمح وحدة واقفة عند المرآيات عجبته نعومتها ووقف يتأملها وسمر التفتت بتطلع وكانت تناظر جزمتها<< من زود الإعجاب بالجزمه؟؟..وتغني بصوت واطي وما وفها إلا جسم رجال طويل "بدر كان شعره أسود فاحم ناعم وطويل شوي وعيونه بني غامق ولابس cat أبيض وجينز low west" بدر مسك سمر مع خصرها يوم حس أنها اختل توازنها أما هي حطت يدينها حول رقبته خوف منها لا تطيح ويوم رفعت عينها بعينه ذابت سمر بجمال عيونه ورموشه الطوال وحاجبه المقطوع من وسطه بسبب جرح أما هو كان يطالع شفايفها لأن شفايفها عجبته حيل وكانت شفايفها من الشفايف المليانة وما صحت سمر من سرحانها إلا على حركة شفايف بدر.. بدر يوم شاف جمالها خاف ما يقدر يمسك نفسه ويتهور ويسوي شي يندم عليه عشان كذا عض شفته اللي تحت و سمر بعدت عنه ونزلت يدها من عليه بس هو ما زال للحين ماسك خصرها ..
سمر بتردد:لو سمحت ممكن تتركني؟
بدر:لا ..وبخبث:إلا بشرط
سمر:شنو شرطك؟
بدر :قولي بدر
سمر استغربت طلبه الغريب:ليش؟
بدر:أموت وأشوف شفايفك تنطق بها يلا قولي ولا ما راح أتركك
سمر حاولت تبعده عنها:اتركني
بدر قربها أكثر منه وتمسك فيها بشكل أكبر:لا يعني لا قولي بدر
سمر :إذا قلت اسمك تتركني؟
بدر:إيه
سمر بنعومة:استحي
بدر:يا عمري على اللي يستحون يلا عشانك بس بأنزل رأسي واهمسي باسمي
أبي اسمعك حلمي أنا اسمع اسمي من فم وحدة لها شفايف مثل شفايفك مليانة
سمر يوم شافته نزل رأسه قربت هي من عند أذنه وهمست:بــدر
بدر ذاب من صوتها الناعم وتركها ويوم كانت بتروح ناداها: ســمر
سمر لا شعورياً: لبــيه
بدر ابتسم:لبيتي في منى إن شاء الله....ووقف عندها وقرب منها ونزل على ركبه وحدة ومسك يدها وقال:
تتزوجــــيني؟
سمر سحبت يدها بسرعة:بدر أنت صاحي؟؟ ولا شارب شي؟
بدر ضحك :لا والله بس عجبتيني وحبيت أتزوجك قبل ما تروحين لغيري أبيك أنتي لأنك الوحيدة اللي لقيت فيها كل الصفات اللي كنت أبيها بزوجتي المستقبلية ولا زلت
سمر بغرور:والله إحنا مو أجانب عشان تطلبني من نفسي وبعدين ردي عليك لا
بدر سحبها ووقفوا عند المرآية ووقف وراها وحط رأسه عند كتفها ومسك خصرها وقال بصوت واطي:شفتي قد ايش مناسبين أحنا لبعض
سمر بعدت عنه وراحت للبنات ركض وهي خايفة من دقات قلبها يوم قال هالكلام وراحت جلست معاهم وهي تتنفس بسرعة ..
قمر: سمر ليش تأخرت كل هالوقت؟
سمر بارتباك: لا كنت أعدل تسريحتي وطولت

** أما بدر يوم رجع ما لاحظوا الشباب اختفائه وقعد بس انتبهت قمر على نظرات بدر لسمر ونادت فيض
قمر:فيض تعالي شوفي الفيلم
فيض ما فهمت عليها: أي فيلم؟
قمر:بدر يطالع سمر وسمر لا انتبهت له ابتسمت
فيض:أكيد في شي صاير
قمر: لاحظت بعد شي ثاني أنه يوم رجعت سمر رجع بدر معاها يعني صار شي إحنا ما ندري عنه.. بس ولا يهمك بنعرفه بعدين منها

**سلطان قرب من فيض ووقفها ..
فيض:سلطان وش فيك؟
سلطان:ما فيني شي بس أبغى أرقص معاك قومي ولا تناقشيني!!
فيض وقفت مع سلطان حطت يدينها حول رقبته مسكها مع خصرها ورقصوا على أغنية slow Dance
((الرقص البطئ))و يسولفون وهم ناسين ومتناسين الدنيا اللي حولهم وتركي ميـت من الغيرة كيف يلمسها سلطان كذا وهي فرحانة فيه وتعوذ من أفكاره لأنها زوجته وراحت قمر لتركي وسحبته مع يده
تركي استغرب من حركتها:قمر وش فيك ساحبتني كأني غنمه
قمر ضحكت:تصدق حلوة ذي غنمه تخيل شكلك وأنت غنمه والله تضحك
تركي باستهزاء: ها ها ها يضحك تصدقين
قمر: لحظه أبغى أرقص معاك
تركي: صاحية أنتي!! بعدين مالي خلق أرقص
قمر:شوف فيض و سلطان يرقصون عادي ارقص معي ياخي..
تركي التفت وشاف فيض كيف تطالع سلطان و كيف لاصقه فيه
تركي أنقهر: تدرين قومي بس

**تركي وقف مع قمر يرقصون هالمرة فارس اللي كان ساكت من يوم ما جاء أنقهر ومات من الغيرة بس مع كذا هذا أخوها بس غصب عنه يغار منه لأنه يقدر يكلمها وهو لا.. يقدر تركي يلمسها وهو لا .. تقدر تبتسم بوجه تركي وهو لا ..لو عليه كان راح لها وابعد تركي عنها ثم بأقوى ما عنده ضمها..

**بدر يوم شاف سمر قاعدة مع ريما طفشانة و متململة وما في أحد جالس إلا هو وفارس طرت على باله فكرة خبيثة وابتسم ابتسامة خبث وهو يطالع سمر راح ووقف جنب سلطان
بدر: فيض ممكن لحظة بآخذ سلطان منك شوي؟
فيض:عادي
سلطان راح مع بدر وسمر تناظر بدر مستغربة وبدر يكلم سلطان أول شي سلطان كشر بوجهه بس وقفه بدر من جديد ثم هالمرة ابتسم وهز رأسه موافق ورجع يرقص من جديد مع فيض وسمر تطالع كل هذا
أما بدر بعد ما كلم سلطان التفت على سمر وقرب منها أما سمر خافت من اللي ممكن يسويه قدامهم كلهم لأنها عرفت من ريما أنه جرئ بس جراءته على وقاحة مثل سلطان..

**بدر مسك يد سمر :shall we dance ?
" ممكن نرقص؟"
سمر:سلطان؟
بدر بخبث: أقنعت سلطان
سمر: how?
"كيف؟"
بدر: If I tall you I have to kill you
"إذا قلت لك لازم أقتلك"
بدر: والحين تحركي
سمر قامت من مكانها وكانوا بيرقصون بس يوم قرب منها بدر فجأة التفت على سلطان وراح عنده وكلمه وهز سلطان رأسه موافق ثم التفت بدر على سمر
سمر: وش هذا اللي تو؟
بدر: هذا استئذان يا طويلة العمر
سمر: ايش؟
بدر:قلت لسلطان ممكن ألمسها؟
قال بشرط التزم حدودك قلت له إن شاء الله
سمر بنص عين: أكيد؟
بدر بابتسامة :أكيدين
مسك خصرها وسمر حطت يدينها على أكتافه وبدر يوم شاف وين حاطه هي يدها رفع يدها وحطها حول رقبته سمر استحت كثير من حركته وخصوصاً قدام هالناس وأخوها ونزلت سمر رأسها
بدر بنعومة: ارفعي رأسك ممكن؟
سمر بعبط: ليش؟
بدر:أموت وأشوف عيونك أبي أحس بوجودك
سمر رفعت عيونها: بدر
بدر بنعومة: عيون بدر
سمر: جـب

**ويوم خلصوا الجماعة من الوناسة اضطر يستأذن أنه لازم يروح مع ريما لأنه بصراحة الوقت تأخر عليهم ووعدوهم بحضور ثاني لهم

** بدر وريما بالسيارة..
ريما: والله ما أدري على ايش هذي الحفلة مملة ولو كنت بمكانهم وأنا عايشة بهذا العز ما أسوي هالحفلة البسيطة وععع عليهم
و بدر كان سرحان ويبتسم ومو مع ريما نهائيا..ً
(( بدر .. عمره 25 سنة وريما 21 سنة برونزية شعارها أسود طويل ولون عيونها بني غامق بس اللي نخرب عليها التناقض اللي بشخصيتها واللي بتلاحظونه الحين))
ريما: بدر أنا أكلمك أنت معي؟؟
بدر انتبه: هاه..إيه إيه معك
ريما " واضح" : طيب وش قلت؟
بدر : ريما
ريما : نعم
بدر : وش رأيك بسمر؟
ريما : من أي ناحية؟؟
بدر: من كل النواحي
ريما : مقبولة بس ليه السؤال؟؟
بدر بابتسامة غريبة: بأتزوجـــــــــها..
ريما انفجعت: وشـو!! صاحي أنت وش تخربط به؟؟
بدر بجدية: عجبتني وناوي أتزوجها
ريما : بدر فكر زين أول مرة تشوف البنت وطقيت الميانة ما قلنا شي بس تتزوجها !! ...
وبحزن: فكر فيها هي شوي أنت تدري بحالتك كيف
بدر عصب من كلامها: شوفي أنتِ مالك دخل فيني أسوي أنا اللي أبيه وإذا بغيتها بأخذها لا أنتِ ولا وحدة من أشكالك ممكن تمنعني!!
ريما بحزن: بدر حرام عليك لا تظلم نفسك وتظلم البنت معك صح أنها ما أعجبتني بس ما أتمنى لها إلا مل خير وعارفه بتستهزئ وبتقول لي ريما من متى تهتم بس حتى ولو مع كذا ممكن تعذب نفسك وتعذبها معاك حرام عليك تعذب بنت الناس معك<< متناقضة ما قلت لكم
بدر حس شوي بالذنب من اللي ممكن يرتكبه بسمر لو تزوجها بس تجاهل هذا الشعور: ريما الموضوع انتهى ولا أشوفك تفتحينه من جديد ولا أبي أشوفك تتكلمين مع البنت أو تلمحين لها عن حالتي فاهمة!! ولا أعيد كلامي مرة ثانيه!!
ريما بنبرة خوف: لا لا خلاص فهمت ... بس بدر
بدر صرخ عليها بأقوى ما عنده : ولا كلمـة!!!

** ويوم انتهت الحفلة ..
فارس..
كئيب على تجاهل قمر له
سلطان وفيض..
عايشين بحبهم وفرحانين..
تركي..
مقهور من تقرب فيض لسلطان ونظراتها له بس يرجع يتعوذ من إبليس على أفكاره
قمر..
تحاول تتناسى الهموم اللي في قلبها
سمر..
تختبر مشاعر غريبة عليها
ريما ..
خايفة على بدر
بدر..
ناوي ينفذ اللي بباله..

_________________